Gjatë viteve 2019 dhe 2020, Ambasadori i Urdhrit Sovran të Maltës pati mundësinë të takohej në disa raste me Kryegjyshin Botëror Bektashian, Hirësinë e Tij Haxhi Dede Edmond Brahimaj, i cili e ka selinë botërore në Tiranë dhe ka mbi 7 milionë besimtarë në mbarë botën. Urdhri Bektashi është pjesë e pandarë e historisë shqiptare dhe që në vitin e parë të misionit marrëdhëniet mes dy Urdhrave kanë qenë të përzemërta.

Më 11 shkurt, Ambasadori Palumbo u prit në një takim zyrtar nga Kryegjyshi Botëror Bektashian, Hirësia e Tij Haxhi Dede Edmond Brahimaj.

Hirësia e njohu Ambasadorin me rrugëtimin shpirtëror të bektashinjve nga viti 1930, kur u krijua Qendra Botërore në Tiranë e deri më sot. Ambasadori u informua edhe për sakrificat e panumërta të klerikëve bektashinj, kontributin e tyre për liri e pavarësi si dhe urtësinë për t’iu afruar me përkushtim krijuesit.

Kreu i Botës Bektashiane Hirësia Haxhi Dede Edmond Brahimaj, e njohu Ambasadorin me sfidat aktuale të Selisë së Shenjtë Bektashiane, si në kuadrin e harmonisë fetare në Ballkan, ashtu edhe sfidat e lirisë së besimit dhe besimit.

Nga ana e tij, Ambasadori Palumbo falënderoi Hirësinë e Tij për pritjen e ngrohtë dhe tha se ishte një kënaqësi e veçantë të vizitoja objekte të tilla që frymëzojnë vetëm paqe. Ai ndër të tjera tha se marrëdhëniet mes Urdhrit të Maltës dhe Qendrës Botërore Bektashiane do të jenë gjithmonë vëllazërore, për hir të paqes dhe lirisë fetare.